॥ भोत ॥
असं का होत असेल
आम्ही तिथं पोहोचले की,
पंगत उठत असेल
आम्ही महाप्रयासाने
त्यांची पायरी गाठली की,
ते आम्हाला प्यादेमात देतात
बाकी काही नाही
चोख्या तुझी पायरी तिथंचं
जोहार म्हणं नाही तर
खुशाल रंडका चाळा
नियती, कर्माचा
पापपुण्याचा फेरा
पुन्हा उरावर घात
करण्या रिंगण खेळ
मांडणारे, मोडणारे न्यायधीश
पुन्हा आमचे नवरे
खरं खोटं
गेला बाजार
आमची ठासली,
पुन्हा आमची लढाई
आमच्याशी
तुक्या वाणी फुकाचा
फुले तुझा शिक्षणाचा मळा
सुकून गेला
तो पुन्हा फुलवण्यासाठी
भिमा तुझा
शिकण्याचा सल्ला पडला महाग
आम्ही शिकलो,
ते म्हणाले हे out Dated
पुन्हा लायनीत लागा
साला, होतो तिथंच आहे
भोग म्हणावा का जागतिकीकरणाचा तिढा
पुन्हा
तुमचा कर्मसिद्धांत, वांझोट्या घराला व्यवस्थेच्या रूपाला, शाहू तू
भोत म्हणावं का ?
भोत म्हणून माझी
कैफियत
मांडण्यासाठी खाजगीकरण, भंडवलीकरणचा गुताडा सोडवण्यासाठी
पुन्हा
भोत भरण्याची विद्या
भोत शिवण्याची विद्या
भोताची व्यवस्था
उलगडत बसावं का?
पुन्हा रांडमुंड
माळावर
मी गात बसावं
माझं भोताचं गाणं
आम्हाला आमची आपबीती
सांगावी लागलं
नाही तर
आम्हीचं ठरू भोत
म्हणून
घाई घाईनं भोत भरतो
व्यवस्थेच्या म्हैशीला पान्हा फुटतो
पण
भोताच्या निर्जीव तोंडला फेस ना येतो
वाळूत मुता
फेस ना पाणी
आमची दाद पुकार
कंदीलाच्या उजेडात
पुन्हा भादवा पेटावा
भोत उरात घेऊन
वरात तुझ्या दारात
बसा परत भोत शिवतं
आम्ही ठरवलं
तुम्हाला फाट्यावर मरायचं
पण तुमची ताकद, इगद खंडीभर
तुम्ही बडवता अंडं आमची
जुपता पुन्हा नांगराला
ते चिटकती गुचीडा, सारखे
जांघात नको तिथं
आम्हाला घुसता येईला का ?
गुचीड़ होऊन रक्त पिऊन चांगला जाडजुड रक्तबीज
वांझ भोताचा
असण्याचा खेळ
मला उलगडत नाही
भोत व्यवस्थेचा भोग
की
आणखी काही !
खुशाल पेटव दिवटी
लय गेले त्या वाटनं
तू चाल
भोत बोलतो, चालतो, हसतो
त्याला ओळख
मी तुझ्या गांडीजवळ
मला ओळख
मी भोत तो भोत
शेवटी सगळे भोत
डॉ. जी. आर. ढेंबरे , रावेर
कोणत्याही टिप्पण्या नाहीत:
टिप्पणी पोस्ट करा